Ўзбекистон Суперлигасининг 20-туридан ўрин олган "Навбаҳор" — "Локомотив" учрашуви олдидан наманганликлар ҳимоячиси Муҳаммадқодир Ҳамралиев бўлажак баҳс ҳақидаги фикрлари билан ўртоқлашди.
25 ёшли футболчининг таъкидлашича, "Локомотив" жорий мавсумни хорижлик мураббий қўл остида яхши ўтказмоқда ва турнир жадвалида юқори ўринлардан бирини эгаллаб турибди. Шу сабабли Ҳамралиев Намангандаги беллашув кескин ва муросасиз курашларга бой бўлишини кутмоқда.
"Жамоамиз қаторасига 6 та баҳсда ғалаба қозонди. "Локомотив"га қарши ўйинда ҳам ушбу ёқимли анъанани ва ғалабали сериямизни давом эттириш ниятида майдонга тушамиз", — деди Ҳамралиев.
Ҳимоячи жамоанинг сўнгги натижаларида Наманган мухлисларининг қўллаб-қувватлаши ҳам муҳим ўрин тутаётганини алоҳида таъкидлади.
"Ўз уйингда деворлар ҳам ёрдам беради, дейишганидек, Намангандаги муваффақиятларимизда мухлисларнинг қўллаб-қувватлаши муҳим омил бўлмоқда. "Локомотив"га қарши ўйинда ҳам ишқибозлар стадионни тўлдириб, жамоамизни муносиб қўллаб-қувватлашади ва ғалабамизга мададкор бўлишади, деган умиддаман. Биз эса уларнинг ишончини оқлаш учун барча имкониятимизни ишга соламиз", — деди "Навбаҳор" футболчиси.
"Навбаҳор" — "Локомотив" учрашуви бугун, 4 сентябрь куни соат 19:00 да бошланади.
