O‘zbekiston Superligasining 20-turidan o‘rin olgan "Navbahor" — "Lokomotiv" uchrashuvi oldidan namanganliklar himoyachisi Muhammadqodir Hamraliyev bo‘lajak bahs haqidagi fikrlari bilan o‘rtoqlashdi.

25 yoshli futbolchining ta’kidlashicha, "Lokomotiv" joriy mavsumni xorijlik murabbiy qo‘l ostida yaxshi o‘tkazmoqda va turnir jadvalida yuqori o‘rinlardan birini egallab turibdi. Shu sababli Hamraliyev Namangandagi bellashuv keskin va murosasiz kurashlarga boy bo‘lishini kutmoqda.

"Jamoamiz qatorasiga 6 ta bahsda g‘alaba qozondi. "Lokomotiv"ga qarshi o‘yinda ham ushbu yoqimli an’anani va g‘alabali seriyamizni davom ettirish niyatida maydonga tushamiz", — dedi Hamraliyev.

Himoyachi jamoaning so‘nggi natijalarida Namangan muxlislarining qo‘llab-quvvatlashi ham muhim o‘rin tutayotganini alohida ta’kidladi.

"O‘z uyingda devorlar ham yordam beradi, deyishganidek, Namangandagi muvaffaqiyatlarimizda muxlislarning qo‘llab-quvvatlashi muhim omil bo‘lmoqda. "Lokomotiv"ga qarshi o‘yinda ham ishqibozlar stadionni to‘ldirib, jamoamizni munosib qo‘llab-quvvatlashadi va g‘alabamizga madadkor bo‘lishadi, degan umiddaman. Biz esa ularning ishonchini oqlash uchun barcha imkoniyatimizni ishga solamiz", — dedi "Navbahor" futbolchisi.

"Navbahor" — "Lokomotiv" uchrashuvi bugun, 4 sentyabr kuni soat 19:00 da boshlanadi.