Bild маълумотига кўра, "Боруссия Дортмунд" Итан Нванерини ижарага олишга фақат Микель Артета сўнгги лаҳзагача иккиланганидан кейин эришган.
"Арсенал" бош мураббийи Леандро Троссард ва Габриэл Мартинелли жамоани тарк этганидан сўнг ҳужум чизиғидаги танлов қисқариб кетишидан хавотирланган ва Нванерини қўйиб юбориш масаласини узоқ ўйлаган.
"Боруссия"нинг футболчига қизиқиши янги трансфер Яннис Константелиас тиззасидан жиддий жароҳат олганидан кейин янада кучайган. Шундан сўнг клуб спорт директори Нилс-Оле Бук келишувни амалга ошириш учун фаол ҳаракат қилган.
"Биз бу позиция учун аввалдан футболчи қидираётган эдик. Яккама-якка вазиятларда кучли, тезкор ва яхши дриблинг қила оладиган ўйинчи керак эди.
Нванери жуда иқтидорли футболчи. У Англия U21 терма жамоасида Жоб Беллингем билан бирга ўйнайди. Шунингдек, у Премьер-лига тарихида майдонга тушган энг ёш футболчи. Жаҳон чемпионати олдидан эса Англия миллий терма жамоаси билан ҳам машғулот ўтказган.
Биз бир мавсумга жуда яхши футболчини олдик. Ундан катта умидларимиз бор ва мен уни бу ишончни оқлай олишига ишонаман", — деди "Боруссия" бош мураббийи Нико Ковач.
Аввалроқ "Марсель"даги мураккаб ижарадан қайтган Нванери Дортмундга ўтишида Жоб Беллингемнинг ҳам роли бўлганини айтди.
"У менга доимо Дортмундга келишим кераклигини айтарди. Энди у билан бирга ўйнайдиганимдан хурсандман", — деди Нванери.
Футболчи бу ҳафта охирида "Хоффенхайм"га қарши учрашувда "Боруссия" сафида дебют қилиши мумкин.
