УЕФА Чемпионлар лигаси саралаш босқичи жавоб учрашувидан кейин юз берган жанжал сабаб «Фенербахче» ярим ҳимоячиси Маттео Гендузи ва «Лион» дарвозабонлар мураббийи Антонио Феррейрани жазолади.
Гендузи тўртта ўйинга дисквалификация қилинди. Ушбу жазонинг икки учрашуви бир йиллик синов муддати билан шартли равишда белгиланди. Шунингдек, франциялик футболчи 30 минг евро миқдорида жаримага тортилди.
Антонио Феррейра эса бешта ўйинга дисквалификация қилинди. «Фенербахче» вингери Мейсон Гринвудга ҳам бир учрашувлик шартли дисквалификация берилди.
Бундан ташқари, УЕФА «Лион» клубини 108,5 минг евро, «Фенербахче»ни эса 95 минг евро миқдорида жаримага тортди.
Учрашув якунида Гендузи жамоасининг Чемпионлар лигаси умумий босқичига йўл олганини нишонлаётган пайтда мухлислар билан тортишиб қолган. Футболчи кийиниш хоналари томон йўл олганида Феррейра билан ҳам жанжал юзага келган. Шундан сўнг икки жамоа вакиллари иштирокида оммавий тўқнашув бошланган.
