«ПСЖ» жорий мавсум бошида Франция чемпионатида омадсиз натижалар қайд этмоқда.

Луис Энрике жамоаси Лига 1даги дастлабки икки учрашувини 2:2 ҳисобида дуранг билан якунлади. Ҳар икки баҳсда ҳам парижликлар мағлубиятдан фақат ўйиннинг сўнгги дақиқаларида қутулиб қолди.

«Монако»га қарши учрашув ҳам «ПСЖ» учун оғир кечди. Парижликлар биринчи бўлиб ҳисобни очган бўлса-да, кейинчалик ўз дарвозасидан икки гол ўтказиб, 1:2 ҳисобида мағлуб бўлди.

Opta маълумотига кўра, «ПСЖ» 2005 йил бошидан бери илк бор Лига 1да кетма-кет тўртта учрашувда камида иккитадан гол ўтказиб юборди.

Ушбу нохуш серия ўтган мавсумнинг сўнгги турида бошланган. Ўшанда «ПСЖ» «Париж»га 1:2 ҳисобида мағлуб бўлган эди.

Ўтган мавсумда «ПСЖ» «Ланс»ни 6 очкога ортда қолдириб, Франция чемпиони бўлган. «Монако» эса мавсумни 7-ўринда якунлаган эди.