«Пари Сен-Жермен» президенти Носир Ал-Хелаифий бош мураббий Луис Энрике ва жамоанинг беш нафар футболчиси билан шартномалар узайтирилгани ҳақида фикр билдирди.

Парижликлар бош мураббий билан янги келишувни 2030 йилгача узайтирди. Шунингдек, клуб Фабиан Руис билан 2028 йилгача, Вильян Пачо, Жоау Невеш, Лукас Бералдо ва Сенни Майулу билан эса 2031 йилгача мўлжалланган шартномалар имзолади.

«Луис Энрике, Сенни Майулу, Жоау Невеш, Вильян Пачо, Лукас Бералдо ва Фабиан Руис «ПСЖ» билан биргаликдаги йўлини давом эттиришидан хурсандмиз.

Уларнинг барчаси клубимизнинг нафақат бугуни, балки келажагини ҳам ифодалайди. Биз истиқболга мўлжалланган лойиҳа қуришга, ўз қадриятларимизга содиқ қолишга ва тарихни қайта ёзишда давом этишга ҳаракат қиляпмиз.

Мақсадимиз — мухлисларимиз биз билан фахрланиши», — деди Ал-Хелайфий.