Илия Топурия Жастин Гэтжига мағлуб бўлганидан сўнг баёнот берди.

UFC собиқ чемпиони Илия Топурия Оқ уйдаги турнирда Жастин Гэтжига мағлуб бўлганидан сўнг баёнот берди. Топурия ўғли Угога мурожаат шаклида видео ёзиб олди.

«Уго, сўнгги бир неча кун ичида сен ҳақингда ўйладим. Мен йиқилганимда сен нимани ҳис қилганинг ҳақида ўйладим. Бу сенга оғир ботганини биламан. Оталарча, сени бу ҳолатдан асраш учун қўлимдан келган барча ишни қилган бўлардим. Аммо буни бирга бошдан кечирганимиздан хурсандман, чунки ўша кун бизни янада кучли қилди.

Бир нарсани эслаб қолишингни хоҳлайман: ҳаётда ҳар доим ҳам ғалаба қозонавермайсан. Бу оддий ҳол, чунки мағлубият энг муҳими эмас. Муҳими, атрофинг қоронғу бўлганида қандай инсон бўлишни танлашинг. Ерда қолиш ёки ўрнингдан туриш ўртасида танлов қилишга тўғри келганда.

Менимча, Худо бу ҳолатни бошдан кечиришимни ва ҳеч бир ғалаба ўргата олмайдиган сабоқни олишимни истаган. Характер ҳамма нарса режа бўйича кетаётганда намоён бўлмайди. У ҳаёт сенга энг оғир кунни берганда намоён бўлади.

Биласанми, нимани англадим? Бу дўзахдан ўтиб, янада кучли бўлдим. Чемпион ҳеч қачон йиқилмайдиган эмас, балки туриш учун сабаб топадиган инсон», – деди Топурия ижтимоий тармоқлардаги видеосида.

Шунингдек, Топурия видеога қуйидаги изоҳни ёзди: «Ҳамма нарса яхши кетаётганда характер шаклланмайди. Ҳамма нарса режадагидек бўлмаганда шаклланади. Ҳеч ким сендан тортиб ололмайдиган ягона ғалаба – бу сенинг характеринг. Биз қайтамиз».

Топурия Гэтжига техник нокаут билан мағлуб бўлди. Тўртинчи раунддан сўнг Илиянинг бурчаги жангни тўхтатди. Бу Топуриянинг фаолиятидаги илк мағлубият бўлди.