Ҳиндистоннинг Бангалор шаҳрида Tech Mahindra Global Chess League турнирининг янги мавсуми бошланди. Мусобақанинг илк кунида олти жамоа ўзаро баҳс олиб борди.
Ўзбекистонлик гроссмейстер Жавоҳир Синдоров етакчилигидаги “Fyers American Gambits” турнирни икки ғалаба билан бошлади. Жамоа дастлаб “PBG Alaskan Knights”ни йирик 10:4 ҳисобида, кейин эса “Triveni Continental Kings”ни 14:5 ҳисобида мағлуб этди.
Ўзбекистонлик биринчи рақамли шахматчи илк баҳсда 5 карра Жаҳон чемпиони Вишванатан Анандни таслим этди. Иккинчи ўйинда эса FIDE рейтингининг 11-рақамли гроссмйстери франциялик Алиреза Фироузжа билан дурангга имзо чекди. Жавоҳир Синдоровнинг жамоадоши қозоғистонлик шахматчи Бибисора Ассубаева “PBG Alaskan Knights” вакили, аёллар FIDE рейтингининг 4-рақамли шахматчиси хитойлик Жу Жинер ҳамда “Triveni Continental Kings”нинг россиялик тажрибали спортчиси Катерина Лагно билан дуранг натижа қайд этди.
Жавоҳир Синдоров етакчилигидаги жамоа 6 очко билан Global Chess League турнирида пешқадамлик қилмоқда.
Амалдаги чемпион “Alpine APL Pipers” ҳам мусобақани ғалаба билан бошлади. Магнус Карлсен етакчилигидаги жамоа “CheQ Mumba Masters” устидан 10:8 ҳисобида ғалаба қозонди. Учрашувда ҳиндистонлик гроссмейстерлар Видит Гужрати ва Конеру Ҳампи муҳим очколарни жамоасига олиб келди.
Бошқа учрашувда “Ganges Grandmasters” “Triveni Continental Kings”ни мағлуб этди. Натижада “Triveni Continental Kings” турнирнинг илк кунида кетма-кет иккита мағлубиятга учради.
Global Chess League мусобақасида олтита жамоа иштирок этмоқда.
Маълумот учун, 2026 йилда Global Chess League мусобақасининг умумий мукофот жамғармаси 1 млн долларни ташкил этади. Унинг ярми — 500 минг доллар — жамоанинг якуний ўрнига қараб тақсимланади: чемпион 250 минг, кумуш медал соҳиби 125 минг, учинчи ўриндаги жамоа 75 минг, тўртинчи ўриндаги жамоа 50 минг доллар олади.
Яна 450 минг доллар барча жамоалар ўртасида бутун турнир давомида тўплаган ўйин очколари сонига мутаносиб равишда тақсимланади. Қўшимча 50 минг долларни лига ғолиби олади. Шу тариқа мукофот пули миқдори нафақат якуний ўринга, балки ҳар бир алоҳида партия натижасига ҳам боғлиқ. Турнир 13 сентябргача давом этади.
