«Фулхэм» Англия чемпионатининг янги мавсумини жуда омадсиз бошлади. Жамоа ҳозирга қадар ўтказган учта учрашувининг барчасида мағлубиятга учради.

Аввало, «дачниклар» «Челси»га ютқазди. Кейин «Сандерленд»дан мағлуб бўлди, сўнг эса «Кристал Пэлас» ҳам «Фулхэм»ни очкосиз қолдирди.

Бу «Фулхэм»нинг Англия юқори дивизионидаги иштироки тарихида мавсумнинг дастлабки учта ўйинида ҳам мағлуб бўлган учинчи ҳолатдир.

Бундай омадсиз старт илк бор 1951/52 йилги мавсумда кузатилган. Кейин эса 2020/21 йилги мавсумда ҳам жамоа дастлабки уч турнинг барчасида ютқазган.

Эътиборлиси, ҳар икки ҳолатда ҳам «Фулхэм» мавсум якунида юқори дивизионни тарк этган.