Бильбаонинг «Атлетик» клуби бош мураббийи Эдин Терзич «Атлетико» устидан 3:0 ҳисобида қозонилган йирик ғалабадан сўнг фикр билдирди.

«Мен жуда хурсандман ва натижадан мамнунман. Бу жуда юқори суръатда ўтган, кўплаб яхши эпизодларга бой ўйин бўлди ва биз ажойиб натижага эришдик.

Жамоамиздаги барча жиҳатлар менга ёқди, «Сан-Мамес»даги муҳит эса ҳайратланарли даражада эди. Жамоанинг бу ўйинга қандай тайёрлангани ажойиб. Сув ичиш учун танаффусдан кейин ҳам, иккинчи бўлимда ҳам футболчилар жуда яхши кўринишди», — дея Терзичнинг сўзларини Marca келтирмоқда.

Ғалабадан кейин мураббий жамоага қўшимча дам олиш куни берди. Футболчилар машғулотларга сешанба куни қайтади.

«Бу менинг «Атлетик»им эмас, бу бизнинг «Атлетик» ва одамлар айнан шундай жамоани кўришни хоҳлайди.

Замонавий футболда турли ўйин схемаларидан фойдаланиш зарурат. Агар яхши футболчиларинг бўлса, бу унчалик қийин эмас. Бир ўйинда бешта алмаштириш имконияти эса ўйиннинг боришига қараб мослашиш имконини беради.

Бу сафар ҳам кетма-кет иккинчи ўйинда гол ўтказмасликка эришдик», — деди мутахассис.

Юқори ўринлар учун кураш ҳақида Терзич шундай деди:

«Жамоа курашишга тайёр. Якунда қандай натижага эришишимизни ваъда қила олмайман, аммо жамоа ҳозир эга бўлган натижасига тўлиқ лойиқ».

«Атлетик» 6 очко билан 8-ўринда, «Атлетико» эса 7 очко билан 6-поғонада бормоқда.