«Валенсия» мухлислари «Барселона»га қарши Ла Лиганинг 4-тур ўйини олдидан норозилик акциясини ўтказишни режалаштиришмоқда.

Бир нечта мухлислар бирлашмаси «Месталья» стадиони ёнида клуб эгаларининг сиёсатига қарши намойиш ўтказилишини эълон қилди. Ишқибозлар «Валенсия» ташкил топган 1919 йилга ишора сифатида стадионга 19-дақиқагача кирмасликка чақирилмоқда.

Акцияда, хусусан, La Curva Nord, Libertad VCF ва Col·lectiu de Penyes Valencianistes гуруҳлари иштирок этмоқда.

Қўшимча туртки ва кескинлик шундаки, ўйинда клуб эгаси Питер Лимнинг ўғли — Киат Лим иштирок этиши кутилмоқда. У илк бор «Валенсия»нинг расмий ўйинига ташриф буюриши керак.

Мухлислар раҳбариятнинг ишидан, жумладан, трансфер сиёсати ва мавсумнинг бошланишидан норози: «Барселона» билан ўйин олдидан жамоа уч турда бор-yoʻғи бир очко жамғарган.

Баёнотларнинг бирида мухлислар «ўзбошимчалик билан қабул қилинаётган қарорлар» ва «ушбу либоснинг буюклигига мос келмайдиган» ўйинчиларнинг сотиб олинишини тўхтатишни талаб қилишди, шунингдек, клуб эгаларини жамоанинг ўзлиги ва қадриятларини емиришда айблашди.