«Интер» ҳимоячиси Федерико Димарко A Сериянинг 3-туридан ўрин олган «Наполи»га қарши ўйинда (3:2) чап тизисидан жароҳат олди.

Футболист миланликларнинг ғалабаси билан якунланган учрашувнинг 62-дақиқасида майдонни тарк этди.

Тиббий текширувдан сўнг Димаркода чап тизининг енгил созилиш жароҳати ташхисланган. «Интер» ўйинчининг саломатлигини хавф остига қўйишни истамаяпти, шу сабабли унинг Чемпионлар лигаси доирасидаги «Реал»га қарши ўйинда иштирок этиши сўроқ остида қолмоқда.

Sky Sport хабарига кўра, ҳозирда Димарконинг Мадриддаги ўйинда асосий таркибда майдонга тушишини тасаввур қилиш қийин, аммо у барибир жамоа билан бирга Испанияга йўл олиши мумкин.

«Реал» – «Интер» учрашуви сешанба куни «Сантьяго Бернабеу» стадионида бўлиб ўтади.