«Барселона» Ла Лиганинг 4-турида «Валенсия»ни 5:0 ҳисобида йирик тарзда мағлуб этди.

Якшанба куни ўтган учрашувда каталонияликларга ғалаба келтирган голларни Ламин Ямал икки бор, шунингдек Фермин Лопес, Рафинья Диас ва Педри киритди.

Ўйиндан кейинги матбуот анжуманида «Барселона» бош мураббийи Ханс-Дитер Флик жамоасининг кучли томонлари ҳақида гапирар экан, гап орасида адашиб кетди ва бу орқали ҳимоя чизиғидан унчалик ҳам мамнун эмасдек таассурот қолдирди.

«Жамоамиз ҳужумда ва ҳимо... Ҳужумда ва ярим ҳимояда жуда юқори сифатга эга», — дея ўзини тузатди Флик.

Мутахассиснинг сўзларини BarcaTimes келтирди.

«Барселона» Ла Лиганинг дастлабки 4 турида мумкин бўлган 12 очконинг барчасини қўлга киритди. Каталонияликлар бу учрашувларда 17 та гол уриб, ўз дарвозасидан атиги 2 та тўп ўтказиб юборган.