Профессионал бокснинг супер оғир вазн тоифасида собиқ Жаҳон чемпиони Тайсон Фьюри яна бир собиқ чемпион Энтони Жошуа билан узоқ кутилган жанг бекор бўлганини маълум қилди.

Икки боксчи ўртасидаги супер оғир вазн тоифасидаги жанг 2026-йилнинг энг йирик бокс воқеаларидан бири бўлиши кутилаётганди. Бироқ томонлар жангни ўтказиш жойи бўйича якуний келишувга эриша олмади.

Фьюрининг сўзларига кўра, Жошуа жангни ўтказишдан бош тортган. У аввалроқ баҳсни Нью-Ёркдаги “Madison Square Garden” аренасида ташкил этиш мумкинлигини қўллаб-қувватлаган эди.

Жошуа ва унинг промоутери Эдди Хирн эса жангни Буюк Британияда ўтказиш тарафдори бўлган. Хусусан, “Уэмбли” стадионида жанг ташкил этиш бўйича музокаралар олиб борилгани хабар қилинган.

Аввалроқ, Фьюри ва Жошуа ўртасидаги баҳс ноябрь ойида бўлиб ўтиши мумкинлиги ҳақида маълумотлар тарқалган эди. Аммо жанг санаси ва манзили расман тасдиқланмаганди.

Шу билан бирга, Фьюри яна украиналик Олександр Усик билан учинчи жанг ўтказиш истагини билдирди. Усик аввалги икки баҳсда британиялик боксчи устидан ғалаба қозонган.

Ҳозирча Жошуа жамоаси Фьюрининг жанг бекор бўлгани ҳақидаги баёнотига расмий муносабат билдирмади. Шу сабабли томонлар ўртасидаги музокараларнинг якуний тақдири ҳозирча номаълумлигича қолмоқда.

Маълумот учун, 38 ёшли Фьюри профессионал боксда 39 та жанг ўтказиб, уларнинг 36 тасида ғалаба қозонган. “Лўлилар қироли” фақат икки марта мағлубиятга учраган ва битта жанги дуранг билан якунланган. У мутлақ Жаҳон чемпионлиги учун кечган иккита баҳсда украиналик Олександр Усикка имкониятни бой берган.

36 ёшли Жошуа профессионал боксда 34 та жанг ўтказиб, уларнинг 30 тасида ғалаба қозонган (27 тасини нокаут билан). Британиялик собиқ жаҳон чемпиони 4 марта мағлубиятга учраган. У ўз фаолияти давомида Энди Руиз, Олександр Усик (2 марта жанг) ва Даниэль Дюбуа каби боксчиларга имкониятни бой берган эди.

Бундан ташқари, Фьюри Жошуа билан жанг ташкил этилмаса, фаолиятини якунлашини билдирган.