Дортмунднинг «Боруссия» клуби ҳимоячиси ва сардори Вальдемар Антон Чемпионлар лигаси умумий босқичи старти олдидан журналистлар билан мулоқот қилди. 1-турда дортмундликлар «Вильярреал»га қарши майдонга тушади.

«Бу ўйинни жуда катта интиқлик билан кутяпмиз. Чемпионлар лигасида ўз майдонингда ўйнаш — ҳар бир футболчи учун алоҳида воқеа. Ўтган мавсум ортда қолди. Энди олдинга ҳаракат қилишимиз ва эртага биринчи қадамни ташлашимиз керак», — дея Антоннинг сўзларини УЕФА расмий сайти келтирди.

Шунингдек, у жамоадоши Серу Гирасси ҳақида ҳам фикр билдирди.

«Мен Гирассини жуда узоқ вақтдан бери биламан. У ҳозиргидан ҳам яхшироқ ўйнай олади. У биз учун жуда муҳим футболчи», — деди Антон.

Ўтган мавсумда 30 ёшли гвинеялик ҳужумчи Бундеслигада 33 та ўйинда 17 та гол урган. Жорий мавсумни эса 2 та учрашувда 2 та гол билан бошлади.

«Боруссия» — «Вильярреал» учрашуви 8 сентябрь куни бўлиб ўтади.