"Алавес" бош мураббийи Кике Санчес Флорес Ла Лигада 2026 йил август ойининг энг яхши мураббийи деб топилди.
Мазкур соврин учун Санчес Флоресдан ташқари "Барселона" устози Ханси Флик ва "Реал" бош мураббийи Жозе Моуриньо ҳам номзод эди.
Санчес Флорес қўл остида "Алавес" август ойида Ла Лигада учта учрашув ўтказиб, мағлубиятга учрамади. Жамоа "Хетафе"ни 3:0, "Вильярреал"ни 1:0 ҳисобида енгди, "Райо Вальекано" билан эса 1:1 ҳисобида дуранг ўйнади. Натижада "Алавес" 9 имкониятдан 7 очко жамғарди.
Шу учрашувларда Санчес Флорес жамоаси рақиблар дарвозасига 5 та гол урди ва ўз дарвозасидан атиги 1 та тўп ўтказиб юборди. Тўплар нисбати +4ни ташкил қилди.
Қизиғи, унинг рақобатчилари Флик ва Моуриньо августда максимал натижа — учтадан ғалаба ва 9 очко қайд этганди. "Барселона"нинг тўплар нисбати +10, "Реал"ники эса +8 бўлган. Шунга қарамай, овоз бериш якунларига кўра соврин "Алавес" устозига насиб этди.
Санчес Флорес бошчилигидаги "Алавес" сентябрь ойини ҳам йирик ғалаба билан бошлади — 6 сентябрь куни "Осасуна" 5:2 ҳисобида мағлуб этилди. Бу натижа август ойи учун берилган мукофот статистикасига кирмайди.
