«Вулверхэмптон» собиқ «Челси» ва «Астон Вилла» вингери Бертран Траоре билан шартнома имзолаганини расман маълум қилди. 31 ёшли футболчи «бўрилар» сафига эркин агент сифатида қўшилди ва клуб билан бир йиллик шартнома тузди.

Траоренинг сўнгги клуби «Сандерленд» бўлган. Буркина-Фасо терма жамоаси футболчиси «Челси» тарбияланувчиси ҳисобланади. У Лондон клубида профессионал фаолиятини 2014 йилда бошлаган.

Шундан сўнг Траоренинг фаолиятида «Витесс», «Аякс», «Астон Вилла», «Лион», «Истанбул Башакшехир» ва «Вильярреал» клублари бўлган.

«Вулверхэмптон» ўтган мавсум якунида АПЛдан тушиб кетган ва ҳозир Чемпионшипда иштирок этмоқда. Жамоа чемпионатнинг беш туридан сўнг 8 очко билан 9-ўринда бормоқда.