«Ливерпуль» академиясини қайта кучайтириш мақсадида дунё бўйлаб ёш ва иқтидорли футболчиларни излаш бўйича фаол скаутинг кампаниясини бошлади.

Ўтган ёзда асосий таркибни янгилаш учун қарийб 450 миллион фунт сарфланганидан сўнг клуб ёшлар тизимидаги захирани ҳам тўлдиришга катта эътибор қаратмоқда.

Глобал истеъдодлар бўйича директор Мэтт Ньюберри бошчилигида марказий ҳимоячилар Ифеаньи Ндукве ва Мор Талла Ндиайе, шунингдек, колумбиялик плеймейкер Самуэль Мартинес каби футболчилар билан шартнома имзоланди. «Ливерпуль» Мартинес учун курашда «Барселона» ва «Челси»ни ортда қолдирган.

Энг йирик трансфер эса «Генк» дарвозабони Лукка Брюгманс бўлди. Мерсисайдликлар 18 ёшли голкипер учун 30 миллион фунт тўлади. Бу сумма уни тарихдаги энг қиммат ўсмир дарвозабонга айлантирди. «Ливерпуль» унинг трансфери учун «Реал» билан ҳам рақобат қилган.

Жамоа сардори Виржил ван Дейк Ндуквенинг салоҳиятига ҳам юқори баҳо берди:

«У катта иқтидор. Жисмонан бақувват ва ўрганишга жуда чанқоқ», — деди нидерландиялик ҳимоячи.

Шу билан бирга, «Ливерпуль» Грузиянинг иқтидорли футболчиси Андрия Бартишвили учун курашда «Арсенал»га имкониятни бой берган.