«Интер» бош мураббийи Кристиан Киву Чемпионлар лигаси умумий босқичи 1-турида «Реал»дан 1:2 ҳисобида қабул қилинган мағлубиятдан сўнг жамоаси ўйинига баҳо берди.

«Мен умуман жаҳл қилганим йўқ. Аксинча, жамоам кўрсатган жасорат ва характердан хурсандман. Хатолар бўлиб туради — бу спортнинг бир қисми. Энг муҳими, улардан кейин қандай реакция қилиш ва ҳаракатни давом эттириш. Тўғри руҳиятни ўйин охиригача сақлаб қолиш жуда муҳим», — дея Кивунинг сўзларини Football Italia келтиради.

«Менимча, бугун яхши ўйин ўтказдик. Биз устунлик қилишга ҳаракат қилдик ва учрашув давомида ташаббусни қўлда ушлашга интилдик. Бу мени хурсанд қилади ва жамоанинг келажагига ишонч уйғотади.

Биз «Реал» тезкор ҳужумга ўтишлар ва олдинги чизиқдаги футболчиларининг маҳорати эвазига ўз вазиятларига эга бўлишини яхши билардик. Шунга қарамай, сўнгги дақиқаларгача ўйин ичида қолдик, характер кўрсатдик ва яхши ҳаракат қилдик.

Биз бу ерга дуранг учун келмаганимиздан фахрланаман. Жасорат кўрсатдик ва «Реал»дек жамоага қарши муносиб курашдик», — деди «Интер» бош мураббийи.