Ўзбекистон Суперлигасининг 21-тури доирасида "Андижон" ўз майдонида "Қўқон-1912"ни қабул қилади. Учрашув 10 сентябрь куни соат 19:00 да "Бобур Арена"да старт олади ва Futbol TV орқали жонли эфирда намойиш этилади.
Жамоаларнинг ўзаро учрашувлари тарихига назар ташланса, шу кунга қадар улар 31 марта тўқнаш келган. Ушбу баҳсларнинг 11 тасида "Қўқон-1912" ғалаба қозонган бўлса, "Андижон" 10 марта муваффақиятга эришган. Яна 10 та учрашувда дуранг қайд этилган.
Тўплар нисбатида эса устунлик "Андижон" томонида. Андижонликлар ўзаро ўйинларда рақиб дарвозасини 49 марта ишғол қилган. "Қўқон-1912" эса бунга 42 та гол билан жавоб қайтарган.
Энг йирик ғалабалар ҳам ушбу қарама-қаршилик тарихида алоҳида ўрин тутади. "Андижон" рақибини 6:0 ҳисобида мағлуб этган бўлса, "Қўқон-1912"нинг энг йирик ғалабаси 5:1 ҳисобида қайд этилган.
Шу тариқа, ўзаро учрашувлар статистикаси бу жуфтликда кураш доимо кескин кечганини кўрсатмоқда. 21-тур доирасидаги навбатдаги баҳсда ҳам қизиқарли тўқнашув кутилмоқда.
