O‘zbekiston Superligasining 21-turi doirasida "Andijon" o‘z maydonida "Qo‘qon-1912"ni qabul qiladi. Uchrashuv 10 sentyabr kuni soat 19:00 da "Bobur Arena"da start oladi va Futbol TV orqali jonli efirda namoyish etiladi.

Jamoalarning o‘zaro uchrashuvlari tarixiga nazar tashlansa, shu kunga qadar ular 31 marta to‘qnash kelgan. Ushbu bahslarning 11 tasida "Qo‘qon-1912" g‘alaba qozongan bo‘lsa, "Andijon" 10 marta muvaffaqiyatga erishgan. Yana 10 ta uchrashuvda durang qayd etilgan.

To‘plar nisbatida esa ustunlik "Andijon" tomonida. Andijonliklar o‘zaro o‘yinlarda raqib darvozasini 49 marta ishg‘ol qilgan. "Qo‘qon-1912" esa bunga 42 ta gol bilan javob qaytargan.

Eng yirik g‘alabalar ham ushbu qarama-qarshilik tarixida alohida o‘rin tutadi. "Andijon" raqibini 6:0 hisobida mag‘lub etgan bo‘lsa, "Qo‘qon-1912"ning eng yirik g‘alabasi 5:1 hisobida qayd etilgan.

Shu tariqa, o‘zaro uchrashuvlar statistikasi bu juftlikda kurash doimo keskin kechganini ko‘rsatmoqda. 21-tur doirasidagi navbatdagi bahsda ham qiziqarli to‘qnashuv kutilmoqda.