«Бавария» дарвозабони Мануэль Нойер Чемпионлар лигасидаги учинчи ғалабасини қўлга киритиш истагида.

40 ёшли футболчи 2013 ва 2020 йилларда мюнхенликлар билан бош совринни қўлга киритган бўлса-да, фаолиятини яна бир йил давом эттиришга қарор қилди. Унинг таъкидлашича, бунга жамоанинг бу мавсумдаги имкониятларига бўлган ишончи асосий сабаб бўлган.

«Бу мавсумда қўлга киритишимиз мумкин бўлган барча совринлар учун курашишни мақсад қилганман.

Жамоамизда бунга етарли имконият бор, деб ўйлайман. Шунингдек, мураббийлар штаби ва жамоадаги муҳит ҳам юқори натижаларга эришишимизга ишонч уйғотмоқда.

Чемпионлар лигасида учинчи марта ғолиб чиқиш мен учун жуда катта аҳамиятга эга бўлар эди. Албатта, олдинда кучли рақиблар бор. Шунинг учун ҳозир биринчи навбатда мавсумни яхши бошлаш ва ўз вазифамизни бажаришга эътибор қаратишимиз керак», — деди Нойер.