«Арсенал» ярим ҳимоячиси Деклан Райс жорий мавсумда жамоа сафида 60 дан ортиқ ўйин ўтказишга тайёрлигини айтди.

«Сўнгги олти мавсум давомида, ҳатто «Вест Хэм»да ўйнаган ва еврокубокларда иштирок этган пайтларимда ҳам, бир мавсумда 60 тадан ортиқ ўйин ўтказганман. Шунинг учун буни амалга ошириш мумкин, деб ўйлайман, чунки бунга қодир эканимни аллақачон исботлаганман. Фақат шу даража ва ўйиндаги барқарорликни сақлаб қолиш керак.

Мен учун энг муҳими — ҳар ҳафта майдонга чиқиш, яхши ўйин кўрсатиш ва жамоага ғалаба қозонишда ёрдам бериш. Буни амалга ошира олаётганимдан хурсандман. Шунинг учун бу мавсумда ҳам буни яна бир бор исботлашни жуда хоҳлайман», — деди Райс The Guardian нашрига.

АПЛнинг уч туридан сўнг «Арсенал» 9 очко жамғарган ҳолда турнир жадвалида иккинчи ўринда бормоқда.