Криштиану Роналду «Ал-Таавун» ва «Ал-Ҳилол» ўртасидаги ўйинда Рубен Невешга нисбатан мухлисларнинг хатти-ҳаракатларига муносабат билдирди.
Жамоалар ўртасидаги Про-лиганинг 7-тур учрашуви «Ал-Ҳилол»нинг 6:0 ҳисобидаги йирик ғалабаси билан якунланган. Учрашув вақтида мухлислар «Ал-Ҳилол» ярим ҳимоячиси Рубен Невеш тўпга эга бўлганида «Жота, Жота» дея ҳайқиришган.
«Лига бундай ҳолатларга чора кўриши ва мухлисларнинг бу каби хатти-ҳаракатларини жазолаши керак. Бу энди футбол эмас ва бундай ҳолатларнинг чегараси бўлиши лозим. Ўзини бундай тарзда тутадиган одамларга энди ҳеч қачон стадионга киришга рухсат берилмаслиги керак», — деб ёзди Роналду.
Эслатиб ўтамиз, португалиялик ҳужумчи Диогу Жота 2025 йил 3 июль куни 28 ёшида йўл-транспорт ҳодисасида вафот этган. У билан бирга автомашинада унинг акаси Андре Силва ҳам бўлган.
