Krishtianu Ronaldu «Al-Taavun» va «Al-Hilol» o‘rtasidagi o‘yinda Ruben Neveshga nisbatan muxlislarning xatti-harakatlariga munosabat bildirdi.
Jamoalar o‘rtasidagi Pro-liganing 7-tur uchrashuvi «Al-Hilol»ning 6:0 hisobidagi yirik g‘alabasi bilan yakunlangan. Uchrashuv vaqtida muxlislar «Al-Hilol» yarim himoyachisi Ruben Nevesh to‘pga ega bo‘lganida «Jota, Jota» deya hayqirishgan.
«Liga bunday holatlarga chora ko‘rishi va muxlislarning bu kabi xatti-harakatlarini jazolashi kerak. Bu endi futbol emas va bunday holatlarning chegarasi bo‘lishi lozim. O‘zini bunday tarzda tutadigan odamlarga endi hech qachon stadionga kirishga ruxsat berilmasligi kerak», — deb yozdi Ronaldu.
Eslatib o‘tamiz, portugaliyalik hujumchi Diogu Jota 2025 yil 3 iyul kuni 28 yoshida yo‘l-transport hodisasida vafot etgan. U bilan birga avtomashinada uning akasi Andre Silva ham bo‘lgan.
