«Барселона»нинг испаниялик дарвозабони Жоан Гарсия трансфер бозорида катта қизиқишга сабаб бўлмоқда. Бу ҳақда журналист Экрем Конур ижтимоий тармоқларда хабар берди.

Манба маълумотига кўра, Европанинг бир қатор етакчи клублари 25 ёшли дарвозабонни ўз сафига қўшиб олишни режалаштирмоқда. Ҳозирча унга қизиқиш билдираётган клублар номи ошкор қилинмаган.

Жоан Гарсия ўтган йил ёзидан буён «Барселона» шарафини ҳимоя қилиб келмоқда. Унинг каталонияликлар билан амалдаги шартномаси 2031 йил июнь ойи охирига қадар мўлжалланган. Дарвозабоннинг бозор қиймати 45 миллион еврога баҳоланмоқда.

Жорий мавсум Ла Лигада Гарсия 5 та учрашувда майдонга тушиб, 4 та гол ўтказиб юборди. Шу билан бирга, у 3 та баҳсда ўз дарвозаси дахлсизлигини сақлаб қолди.