«Рома» бош мураббийи Джан Пьеро Гасперини «Торино»га қарши 2:0 ҳисобидаги ўйиннинг иккинчи бўлими бошида Дониэлл Маленни алмаштириш сабабини тушунтирди. Мален «Рома»нинг биринчи голини урди ва чемпионатнинг дастлабки тўртта ўйинидаги голлари сонини олтитага етказди.

«Биз таркибдаги барча футболчиларнинг ўсишини хоҳлаймиз. Бу бизнинг саккиз кун ичидаги учинчи ўйинимиз эди ва футболчилар мунтазам равишда 90 дақиқадан ўйнашларига йўл қўйиб бўлмайди.

Агар уларга 20–30 дақиқа дам олиш имконини бера олсак, узоқ муддатда бу муҳим аҳамият касб этиши мумкин. Шунингдек, Дибала ва Маленнинг ортида турган футболчилар ҳам ўз устида ишлаши ва муҳим роль ўйнашга тайёр бўлиши керак. Агар бунинг уддасидан чиқсак, бутун жамоа янада кучли бўлади», — деди Гасперини DAZN эфирида.

Ушбу ғалабадан сўнг «Рома» 12 очко билан Италия чемпионати турнир жадвалида пешқадамлик қилмоқда.