"Вест Хэм Юнайтед", Чехословакия ва Чехия терма жамоаларининг собиқ дарвозабони Людек Миклошко 64 ёшида вафот этди. Бу ҳақда Англия клуби матбуот хизмати хабар берди.
Аввалроқ Миклошко беш йил давомида саратон касаллиги билан курашиб келаётгани маълум қилинган эди. 2024 йил декабрида Англияга қилган сўнгги сафари чоғида у касаллиги ҳақида омма олдида гапириб, даволанишни давом эттирмасликка қарор қилганини билдирган.
Миклошко 1990 йилдан 1998 йилгача "Вест Хэм" шарафини ҳимоя қилган. У клуб сафида жами 291 та учрашув ўтказиб, шуларнинг 93 тасида дарвозасини дахлсиз сақлаган.
Шунингдек, у фаолияти давомида "Куинз Парк Рейнджерс" ва "Баник Острава" клубларида ҳам тўп тепган.
Миклошко Чехословакия терма жамоаси сафида 40 та, Чехия миллий жамоаси таркибида эса 2 та учрашувда майдонга тушган.
Футболчилик фаолиятини якунлаганидан сўнг, у 2001 йилдан 2010 йилгача "Вест Хэм"да мураббий сифатида ишлаган.
