«Ювентус» сардори Глейсон Бремер клуб тарихида ўз номини қолдириш ва Европа лигасида ғолиб чиқиш истаги ҳақида гапирди.

Бразилиялик ҳимоячи мусобақа умумий босқичининг 1-турида НЕКка қарши учрашув арафасида УЕФА расмий сайтига интервью берди.

«Бу клубда тарихга кирган жуда кўп буюк ҳимоячилар бор, айниқса Гаэтано Ширеани алоҳида таъкидлаш мумкин. Ўзимни улар билан солиштириш жуда қийин, чунки босим ниҳоятда катта.

Аммо мен ҳам клуб тарихида ўз изимни қолдиришга умид қиламан ва майдонда доимо бор кучимни — 100 фоизни беришга ҳаракат қиламан», — деди Бремер.

Футболчи, шунингдек, бош мураббий Лучано Спаллеттининг жамоага таъсирини ҳам алоҳида таъкидлади.

«У бизга йўналиш берди ва қайси йўлдан бориш кераклигини кўрсатди. У билан бирга сезиларли даражада ўсдик.

Спаллетти — энг юқори савиядаги мураббий, ғолибликни биладиган мутахассис. У ҳар куни мақсадларимизга эришишимиз учун бизга ёрдам бермоқда», — дея қўшимча қилди Бремер.

«Ювентус» ва НЕК ўртасидаги учрашув 17 сентябрь куни бўлиб ўтади.