«Челси» бош мураббийи Хаби Алонсо клубдаги мулкдорлар ўзгариши ҳақида ўз фикрини билдирди.

Лондон жамоасининг ҳаммуассислари Тодд Боули ва Марк Уолтер ўз улушларини илгари 60 фоиздан ортиқ улушга эгалик қилган Clearlake компаниясига сотишди. Энди Clearlake унинг асосчилари Беҳдад Эгбали ва Хосе Фелисиано тимсолида клуб устидан тўлиқ назоратни қўлга киритди. Боули шунингдек, клуб директорлар кенгаши раиси лавозимини тарк этмоқда. Таъкидланишича, жорий операцион фаолиятда, раҳбарият таркибида ва клуб стратегиясда ҳеч қандай ўзгаришлар бўлмайди.

Клуб иерархиясидаги ўзгаришлар ҳақида

«Ўйлашимча, бу клуб учун муҳим кун, чунки клуб тузилмасида жиддий ўзгаришлар юз бермоқда ва янги мулкдор пайдо бўлмоқда.

Собиқ эгаларига қилган ишлари учун ташаккур. Мен бу ерда йўқ эдим, лекин улар муҳим роль ўйнаганини биламан. Энди эса Беҳдад каттароқ ёки деярли тўлиқ назоратни ўз қўлига олганида, ким бошчи эканлиги аниқ бўлгани яхши деб ўйлайман.

Менинг Беҳдад билан жуда яхши муносабатларим бор. Айнан у Мадридга келиб, менга клуб лойиҳасини тушунтириб берган ва мени ишонтирган эди, биз биргаликда яхши ишлаяпмиз. Мен таъкидлаб ўтганимдек, жамоа нуқтаи назаридан лойиҳанинг биринчи босқичини якунладик. Бу яхши ва энди биз биргаликда олдинга ҳаракат қиламиз».

Жамоа асосий совринлар учун курашга қайтишига қанчалик аминлиги ҳақида

«Айнан шунинг учун ҳам биз шу ердамиз. Рақобат қанақа эканини, шунингдек, клубнинг амбициялари ва салоҳиятини, ўйинчилар миқёсини, қаерда турганимизни билган ҳолда ушбу позицияни эгаллаш учун ишлаяпмиз. Қаерда бўлишни хоҳлашимизни биламиз. Ҳамма нарса вақт талаб қилишини тушунамиз, аммо бунга эришиш йўлидаги амбицияларимиз аниқ-рашан», — деди Алонсо.