Туриннинг «Ювентус» клуби еврокубоклардаги янги мавсумини жуда муваффақиятли бошлади. Жамоа Европа лигасининг илк турида Нидерландиянинг НЕК клубини 5:0 ҳисобида мағлуб этди.

«Ювентус»нинг иккинчи голини биринчи бўлим ўрталарида жамоанинг янги футболчиси — босниялик ярим ҳимоячи Керим Алайбегович урди. Бу унинг туринликлар сафидаги илк голи бўлди.

Алайбегович 18 ёшу 361 кунлигида гол уриб, «Ювентус» тарихида 19 ёшга тўлмасдан еврокубок баҳсида тўп киритган атиги иккинчи футболчига айланди.

Бу натижага биринчи бўлиб 1963 йилда Жанфранко Дзигони эришган. Ўшанда у Белграднинг ОФК клуби дарвозасини ишғол қилган эди.