«Барселона» ва Испания терма жамоаси вингери Ламин Ямаль ўз ўйини ва гол ура олмаганидан кейинги ҳолати ҳақида гапирди.

19 ёшли футболчининг таъкидлашича, у голлар сонига ортиқча эътибор қаратмайди. Унинг фикрича, футболда фақат гол уриш эмас, балки ҳужумнинг бошидан охиригача қандай ривожлангани ҳам муҳим.

«Кўплаб ўйинларда шундай ҳолатлар бўлганки, мен ҳақиқий шоу кўрсатганимни ҳис қилганман, аммо гол ура олмаганман. Шунга қарамай, жуда хурсанд бўлиб ухлайман. Чунки футбол фақат гол урган футболчи эмас, балки ҳужумнинг дарвозабондан бошлаб қандай ривожланганидир.

Уйда баъзида жаҳлим чиқади. Онам мендан гол ура олмаганимдан хафа бўлган-бўлмаганимни сўрайди. Мен эса унга ҳеч қачон гол ура олмаганим учун жаҳлим чиқмаслигини айтаман. Гол — статистика учун. Агар тўпга деярли тегмасам ёки майдонда футболдан завқ олмасам, ана шунда жаҳлим чиқади. Мени энг кўп хафа қиладиган нарса шу», — деди Ямаль Movistar Plus телеканали дастурида.

Ламин Ямаль ўтган йили «Олтин тўп» учун овоз беришда иккинчи ўринни эгаллаган эди.