«Манчестер Юнайтед» бош мураббийи Майкл Каррик 15 ёшли иқтидорли футболчи Жей Жей Габриэль билан боғлиқ вазиятда клуб эҳтиёткорлик билан ҳаракат қилиши кераклигини таъкидлади.

«Кичик Месси» лақаби билан танилган Габриэль шу ҳафта «Манчестер Юнайтед»даги рўйхатдан чиқарилишини ва эркин агент мақомини олишни сўраган.

Ёш футболчига «Барселона», «Реал», «Арсенал» ва «Челси» қизиқиш билдирмоқда.

«У ҳали жуда ёш. Бу масалада ортиқча маълумот тарқатмаслигимиз муҳим. Унга нисбатан эътибор ва босим жуда катта бўлиши мумкин, шунинг учун эҳтиёткор бўлишимиз керак.

Биз вазиятга оқилона ёндашиб, биринчи навбатда унинг манфаатини ўйлашимиз лозим. Бу масала ўз ечимини топади», — деди Каррик.

Габриэл 17 ёшга тўлмагунча профессионал шартнома имзолай олмайди.

Ўтган мавсумда у «Манчестер Юнайтед»нинг U18 жамоаси сафида 23 та учрашувда 23 та гол урди ва U18 Премьер-лигасининг мавсумдаги энг яхши футболчиси деб топилди.