"Манчестер Сити"нинг собиқ ҳужумчиси Серхио Агуэро "шаҳарликлар" форварди Эрлинг Холанд унинг клубдаги голлар бўйича рекордини янгилай оладими, деган саволга жавоб берди.
"Менимча, ҳа. Агар у шу тарзда давом этса, мени ортда қолдирмаслигига деярли имконият йўқ. У дунёнинг энг яхши ҳужумчиларидан бири.
Аммо у мени ортда қолдирса ҳам, мен барибир энг яхшилар қаторида қоламан, шунинг учун бу унчалик катта аҳамиятга эга эмас. Энг муҳими, Холанд гол уриши ва "Сити"га ўйинлар ҳамда совринларни ютишда ёрдам бериши", — деди Агуэро Stake Football нашрига.
Агуэро "Манчестер Сити" тарихидаги энг яхши тўпурар ҳисобланади. Аргентиналик футболчи 2011 йилдан 2021 йилгача "шаҳарликлар" сафида ўйнаб, 390 та учрашувда 260 та гол урган ва 65 та голли узатмани амалга оширган.
Холанд "Манчестер Сити" шарафини 2022 йилдан буён ҳимоя қилиб келмоқда. У 204 та учрашувда 168 та гол ва 30 та голли узатма қайд этган.
