"Бавария" ҳужумчиси Харри Кейн яна бир бор клубдаги келажаги ҳақидаги саволга жавоб берди.
Мюнхен клуби раҳбарияти англиялик футболчи билан яқин вақт ичида янги шартнома тузишни истамоқда. Амалдаги келишув жорий мавсум якунланганидан сўнг ўз ниҳоясига етади.
"Аввал ҳам айтганимдек, мен "Бавария"да жуда бахтлиман. Музокаралар давом этмоқда. Мухлислар менга кўрсатаётган қўллаб-қувватлашни жуда қадрлайман", — дея Кейннинг сўзларини Bayern & Germany келтирди.
Жума куни 33 ёшли ҳужумчи Бундеслигада Берлиннинг "Унион" клубига қарши ўйинда дубль қайд этди. Учрашув "Бавария"нинг 7:0 ҳисобидаги ғалабаси билан якунланди.
Кейн Бундеслигада 100 та голлик маррага атиги 98 та ўйинда етиб, Германия чемпионати рекордини ўрнатди. "Унион"га қарши баҳсдаги иккинчи гол эса унинг Бундеслигадаги 101-голи бўлди.
