Ёзги трансфер ойнасида ярим ҳимоячи Родри «Манчестер Сити»дан «Барселона»га ўтди. El Nacional нашри футболчининг «Камп Ноу»да дуч келган янги шароитлари ҳақида материал эълон қилди.
Родри аввал бошда унга Хосеп Гвардиола футболига мутлақо ўхшамайдиган янги услубга мослашишга тўғри келади, деб ўйлаган. Бироқ Ханс-Дитер Флик билан дастлабки ҳафталардаги иш жараёни ярим ҳимоячини ҳайратда қолдирган.
«Родрининг фикрича, Флик шундай агрессив ва юқори темпдаги тизим яратганки, у бундай футболни ҳатто «Манчестер Сити»да ҳам кўрмаган. Уни энг кўп ҳайратга солган жиҳат — «Барселона» тўп назорати, юқори прессинг ва анча тик йўналишдаги ҳужумларни бир-бири билан жуда осон уйғунлаштира олиши», — дейилади материалда.
Трансфердан кейин Родри мослашиш учун унга бир неча ой керак бўлади, деб ҳисоблаган. Аммо ярим ҳимоячи деярли дарҳол ўзини қулай ҳис қила бошлаган.
Родрига айниқса жамоанинг тўпсиз ҳаракатдаги юқори интенсивлиги ёқмоқда. Флик жамоадан тўп йўқотилганидан кейин уни бир неча сония ичида қайта олиб қўйишни талаб қилади.
«Барселона» мураббийи Родрини фақат бир жойда ҳаракат қиладиган статик футболчига айлантирмаган. «Олтин тўп» соҳиби ҳужумларни бошлаши, қанот ҳимоячиларини суғурталаши ва Педри тўпни қабул қилиш учун орқароққа тушганда олдинга чиқиши мумкин.
Гвардиола бошқарган «Манчестер Сити» одатда бўш ҳудуд пайдо бўлгунга қадар тўпни узоқ назорат қиларди. Флик ҳам ўйинни назорат қилишни истайди, аммо имконият пайдо бўлиши билан «Барселона» дарвоза томон тезроқ ҳужум қилишини талаб қилади.
«Мана шу ёндашув туфайли Родри жамоада ўз аҳамиятини дарҳол ҳис қилди. У бундай агрессив тизим ўз хусусиятларига шунчалик мос келишини кутмаган эди. Ярим ҳимоячи ҳимоядаги вазифаларидан воз кечмаган ҳолда ўйинни ташкил қилиш учун етарлича эркинликка эга», — деб ёзади нашр.
Родри 2024 йилда «Олтин тўп»ни қўлга киритган.
