Ўзбекистон Суперлигасининг 22-туридан ўрин олган "Бунёдкор" — "Бухоро" учрашуви якунланди.

Тошкентда ўтган баҳсда "Бунёдкор" 2:1 ҳисобида ғалаба қозонди. Учрашувдаги барча голлар биринчи бўлимда урилди.

Ҳисоб 8-дақиқада очилди. Наримонжон Аҳмаджоновнинг узатмасидан кейин Шаҳзоджон Неъматжонов тўпни дарвозага йўллаб, мезбонларни олдинга олиб чиқди.

34-дақиқада "Бухоро" жавоб голини урди. Владимир Родичнинг пасидан Темур Мамасиддиқов унумли фойдаланиб, ҳисобни тенглаштирди — 1:1.

Биринчи бўлимга қўшиб берилган вақтда "Бунёдкор" яна олдинга чиқди. 45+1-дақиқада Носиржон Абдусаломовнинг узатмасидан сўнг Абдулҳамид Икромов жамоасининг иккинчи голини киритди.

Иккинчи бўлимда ҳисоб ўзгармади ва "Бунёдкор" 2:1 ҳисобида муҳим ғалабани қўлга киритди.

Ушбу натижадан кейин "Бунёдкор" очколари сонини 22 тага етказиб, турнир жадвалида 13-ўринга кўтарилди. "Бухоро" эса 34 очко билан 5-поғонада қолди.

Суперлига, 22-тур

"Бунёдкор" — "Бухоро" — 2:1

Голлар: Шаҳзоджон Неъматжонов, 8 — 1:0; Темур Мамасиддиқов, 34 — 1:1; Абдулҳамид Икромов, 45+1 — 2:1.