«Барселона» футболчиси Рафинья Испания Ла Лигасининг 7-турида «Севилья»га қарши учрашувда хет-трик қайд этди.

29 ёшли бразилиялик футболчи 22-дақиқада ҳисобни тенглаштирди. 52-дақиқада эса иккинчи голини уриб, дубль муаллифига айланди. 69-дақиқада у ўйинга сўнгги нуқтани қўйди. Шу тариқа, унинг Испания чемпионатининг жорий мавсумидаги голлари сони 12 тага етди.

Рафинья XXI асрда Ла Лиганинг дастлабки 7 турида камида 10 та гол уришга эришган учинчи футболчи бўлди. Бунгача бундай натижани фақат «Барселона»нинг собиқ ҳужумчиси Лионель Месси 2011/12 ва 2017/18 мавсумларида ҳамда «Реал»нинг собиқ форварди Криштиану Роналду 2014/15 мавсумида қайд этган.

Ла Лига тарихида яна икки футболчи шундай натижага эришган: Карлос Диарте «Валенсия» сафида 1976/77 мавсумида ва Кини «Спортинг» таркибида 1979/80 мавсумида.

Рафинья «Барселона» шарафини 2022 йил ёзидан буён ҳимоя қилиб келмоқда. Жорий мавсумда у барча мусобақалар доирасида 8 та ўйинда майдонга тушиб, 14 та гол урди ва 3 та голли узатма амалга оширди.

Transfermarkt портали бразилиялик футболчининг бозор қийматини 70 миллион еврога баҳоламоқда.