"Интер Майами" МЛС мунтазам чемпионатининг ўз майдонидаги учрашувида "Сан-Диего" билан 2:2 ҳисобида дуранг ўйнади.
Учрашувнинг 12-дақиқасида меҳмонлар ҳужумчиси Андерс Дрейер ҳисобни очди. 23-дақиқада эса "Интер Майами" ҳужумчиси Лионель Месси жарима зарбасидан гол уриб, ҳисобни тенглаштирди. 39 ёшли аргентиналик футболчи кетма-кет учинчи учрашувда гол урди. Бу Мессининг фаолиятидаги 930-голи бўлди.
75-дақиқада Луис Суарес "Интер Майами"ни олдинга олиб чиқди. Бироқ 82-дақиқада Дрейер дубль қайд этиб, учрашувнинг якуний ҳисобини белгилади — 2:2.
52-дақиқада "Сан-Диего" ҳужумчиси Маркус Ингвартсен гол урган эди, аммо VAR аралашувидан сўнг офсайд сабабли гол бекор қилинди.
"Интер Майами" 26 та ўйиндан кейин 46 очко жамғариб, МЛС Шарқий конференцияси турнир жадвалида 3-ўринни эгаллаб турибди. "Сан-Диего" эса 31 очко билан Ғарбий конференцияда 10-ўринда бормоқда.
Кейинги учрашувда "Интер Майами" 28 сентябрь куни сафарда "Коламбус"га қарши майдонга тушади. "Сан-Диего" эса 27 сентябрь куни меҳмонда "Остин" билан баҳслашади.
