Ўзбекистон миллий терма жамоаси навбатдаги йиғинни бошлади. Жамоанинг ҳужумкор ярим ҳимоячиси Аббосбек Файзуллаев йиғиндаги муҳит ва янги чақирилган футболчилар ҳақида фикр билдирди.
Файзуллаевнинг айтишича, миллий жамоага яна қайтиш футболчилар учун алоҳида аҳамиятга эга. Чунки терма жамоа сўнгги бир неча ой ичида илк бор тўлиқ йиғин ўтказмоқда.
"Терма жамоага қайтиш ҳар доим ёқимли. Икки-уч ойлик танаффусдан кейин яна бирга йиғилдик. Ҳамманинг кайфияти яхши. Бу йиғин биз учун фойдали бўлади, деб ўйлайман", — деди футболчи.
Шунингдек, Файзуллаев таркибга янги ўйинчилар қўшилганига ҳам муносабат билдирди.
"Терма жамоага кучсиз футболчи чақирилмайди. Ким келганидан қатъи назар, энг муҳими — битта жамоа бўлиб ҳаракат қилиш. Янги футболчилар билан танишиб, бир-биримизни яхшироқ тушунишга ҳаракат қиламиз", — деди Аббосбек.
