"Реал" ҳужумчиси Килиан Мбаппе нима учун "ПСЖ"ни тарк этиб, Мадрид клубига ўтишга қарор қилганини тушунтирди.
"ПСЖ"дан кетишга қарор қилганимда, у ердаги вақтим тугаганини ҳис қилгандим. Клуб учун қўлимдан келган барча ишни қилдим ва менимча, вазифамни жуда яхши бажардим. Аммо мен ўз орзумни амалга оширишни, яъни "Реал"да ўйнашни истардим.
25 ёшимда бунинг учун энг яхши пайт эди. Мен учун бу энг тўғри қарор бўлди", деди франциялик ҳужумчи The Athletic'га.
"Мен "ПСЖ"да етти йил ўтказдим. Биз Чемпионлар лигаси финалида, ярим финалларида ва чорак финалларида ўйнадик. Аммо кетиш вақти келганди, клуб эса бошқа йўлдан кетди.
Улар олти ёки етти нафар янги футболчини сотиб олди ва ҳамма нарса ўзгарди. Кейин улар Чемпионлар лигасида ғолиб бўлишди. Уларни табриклайман", дея қўшимча қилди Мбаппе.
Мбаппе 2024 йил ёзида "Реал" сафига келиб қўшилди. Унинг Мадрид клуби билан амалдаги шартномаси 2029 йилгача мўлжалланган.
Transfermarkt маълумотига кўра, франциялик футболчининг бозор қиймати 200 миллион еврони ташкил этади.
