«Бавария» вингери Луис Диас жамоадошлари Харри Кейн ва Майкл Олисе ҳақида фикр билдирди.

Колумбиялик футболчи Кейн билан бир жамоада ўйнаш унда катта таассурот қолдирганини айтди.

«У жуда кўп гол уришини аввалдан билардим. Аммо ҳар куни у билан бир кийиниш хонасида бўлиб, машғулотларда қандай ишлаши ва менталитетини кўрганингда, у сени янада кўпроқ ҳайратга солади», — деди Диас.

Унинг таъкидлашича, Кейн ўйинларда ҳам, машғулотларда ҳам ўзига бирдек юқори талаб қўяди.

Диас Майкл Олисе билан майдондаги ўзаро тушуниш ҳақида ҳам гапирди.

«У марказга силжиганда, мен диагонал бўйлаб очилишим кераклигини биламан. Бу мавсумда бундай вазиятлар бир неча бор бўлди», — деди футболчи.

«Бавария»нинг мавсумдаги мақсадлари ҳақида эса Диас қисқа жавоб берди:

«Биз барча совринлар учун курашишимиз керак».