Норвегия терма жамоаси сардори Мартин Эдегор Миллатлар лигаси доирасида Португалияга қарши бўлажак ўйин олдидан Криштиану Роналду ҳақидаги фикрлари билан ўртоқлашди.
Эдегор аввал «Реал»да Роналду билан бир жамоада бўлган. Норвегиялик футболчи мадридликлар сафидаги дебютини португалиялик ҳужумчининг ўрнига захирадан майдонга тушиш орқали ўтказган. Энди «Арсенал» ярим ҳимоячиси Роналду билан яна, бу сафар миллий жамоалар даражасида тўқнаш келишга тайёрланмоқда.
«Унинг фаолияти ҳақида нима деб ўйлайман? Менимча, бу ерда ҳамма унинг фаолияти шунчаки ақлбовар қилмас даражада эканига қўшилади. Мен ундан кўп нарсани ўргандим», — дея Эдегорнинг сўзларини Goal келтирди.
Норвегия — Португалия учрашуви 27 сентябрь куни бўлиб ўтади. Унга қадар норвегияликлар 24 сентябрь куни Данияга қарши баҳс олиб боради.
