Аргентина терма жамоаси бош мураббийи Лионель Скалони Лионель Мессини октябрь ойида хайрлашув учрашувини ўтказишга кўндирганини маълум қилди.

39 ёшли ҳужумчининг Аргентина терма жамоаси сафидаги сўнгги ўйини 6 октябрь куни Буэнос-Айресда бўлиб ўтади. Унда аргентиналиклар Бенинга қарши майдонга тушади.

"Бундай футболчи бундай хайрлашувга муносиб. Шахсан мен қўлимдан келган барча ишни қилдим. Биз унинг нималарни бошдан кечирганини яхши биламиз. Шунга қарамай, у маҳаллий мухлислар билан хайрлашишни истади.

Менимча, айнан ҳозир унга муносиб ҳурмат кўрсатишимиз керак. Унинг мероси абадий қолади. Мен у билан суҳбатлашиб, бу ўйинни яқин вақт ичида ўтказиш кераклигига ишонтиришга ҳаракат қилдим. Чунки кейин нима бўлишини ҳеч қачон билмайсиз", — деди Скалони.

Лионель Месси Аргентина терма жамоаси сафида 207 та ўйин ўтказиб, 125 та гол урган.