Мадриднинг «Реал» клуби немис ҳимоячиси Антонио Рюдигер ўрнига кимни олиб келишни режалаштираётгани маълум бўлди.

Аввалроқ «Қироллик клуби» 33 ёшли Рюдигер билан шартномани узайтиришни истамаётгани хабар қилинган эди.

MadridistaHoy маълумотига кўра, «Реал» ўз тарбияланувчиси Хакобо Рамонни жамоага қайтаришни режалаштирмоқда. 21 ёшли испаниялик ҳимоячи 2025 йил ёзидан буён Италиянинг «Комо» клуби сафида тўп тепмоқда.

Манба таъкидлашича, Рамон Рюдигер ўрнига олиб келиниши мумкин бўлган асосий трансфер номзоди ҳисобланади.

Жорий мавсумда Хакобо Рамон барча мусобақаларда 6 та ўйинда майдонга тушиб, 1 та гол урди.

Унинг «Комо» билан амалдаги шартномаси 2030 йилга қадар мўлжалланган. Transfermarkt маълумотига кўра, ҳимоячининг бозор қиймати 45 миллион еврони ташкил қилади.