Собиқ футболчилар Рой Кин ва Иан Райт АПЛ молиявий қоидаларини бузиш бўйича ишда мустақил комиссия қароридан кейин "Манчестер Сити"ни жазолашга чақирди.
Комиссия клубни қўйилган 115 та айбловнинг 114 таси бўйича айбдор деб топгани айтилмоқда.
Англия ва Испания ўртасидаги Миллатлар лигаси ўйини вақтида ITV эфирида Кин шундай деди:
"Бу жуда узоқ давом этди. Бу клубнинг ўз танлови эди — улар қоидани бузиш йўлини танлади. Шунинг учун сўнгги йилларда қўлга киритган барча нарсалари учун жазо олиши керак".
Райт ҳам Киннинг фикрини қўллаб-қувватлаб, "Манчестер Сити"нинг ҳаракатлари бошқа жамоалар ва футболчиларнинг натижаларига ҳам таъсир қилган бўлиши мумкинлигини айтди.
"Бу "Ливерпуль", Юрген Клопп ва ўша жамоанинг меросидан нималарни тортиб олди? Улар яна нималарни ютиши мумкин эди? Кин ҳақ — қоидалар бузилган, бошқа одамлар эса улкан имкониятларни қўлдан бой берган", — деди Райт.
Шу билан бирга, "Манчестер Сити" раиси Халдун Ал-Муборак мухлисларга йўллаган очиқ мактубида клуб ўзини айбсиз деб ҳисоблашини яна бир бор таъкидлади.
У жараён ҳали якунланмаганини ва "Сити" ўз позициясини ҳимоя қилишда давом этишини билдирди.
