УЕФА 2026/27 йилги Миллатлар лигаси 1-турининг энг яхши футболчиси бўлишга номзодларни эълон қилди.
Қисқа рўйхатдан Норвегия ҳужумчиси Эрлинг Холанд, Испания вингери Ламин Ямал, Хорватия сардори Лука Модрич ва Германия дарвозабони Марк-Андре тер Штеген жой олди.
Эрлинг Холанд Норвегиянинг Дания устидан 3:2 ҳисобидаги ғалабасида асосий қаҳрамонлардан бири бўлди. "Манчестер Сити" форварди икки марта рақиб дарвозасини ишғол қилди. Унинг 74-дақиқада урган иккинчи голи учрашув тақдирини ҳал қилди.
Ламин Ямал Испаниянинг "Уэмбли"да Англияни 3:2 ҳисобида мағлуб этган баҳсида ўзини кўрсатди. "Барселона" футболчиси учрашувнинг 2-дақиқасида ҳисобни очди. Кейинчалик Испания 1:2 ҳисобида ортда қолган бўлса-да, вазиятни ўзгартириб, ғалабани илиб кетди. Ямал учрашув давомида 7 та зарба ва 4 та калит узатма қайд этди.
40 ёшли Лука Модрич эса Хорватиянинг Чехияга қарши сафардаги 2:1 ҳисобидаги ғалабасида муҳим роль ўйнади. Иккинчи бўлим бошланиши билан Модрич кучли зарба орқали ҳисобни очди. Кейин чехлар мувозанатни тиклаган бўлса-да, Марко Пашаличнинг голи хорватларга уч очко келтирди. УЕФА ҳам Модрични ушбу учрашувда Хорватиянинг етакчи футболчиларидан бири сифатида қайд этди.
Тўртликни Марк-Андре тер Штеген якунлаб берди. Германия Нидерландия билан 1:1 ҳисобида дуранг ўйнаган баҳсда дарвозабон катта ҳажмда иш бажарди. Тер Штеген 9 та сейв амалга ошириб, Германияни бир неча бор голдан қутқарди. Фақат қўшиб берилган дақиқаларда Коди Гакпонинг зарбасини қайтара олмади.
Шу тариқа, Миллатлар лигаси 1-турининг энг яхши футболчиси соврини учун Холанд, Ямаль, Модрич ва тер Штеген даъвогарлик қилмоқда.
