Каталониянинг «Барселона» клуби собиқ дарвозабони Норберто Нето бугун, 27 сентябрь куни «Ювентус»га трансфер олдидан тиббий кўрикдан ўтиш учун Туринга етиб келади. Бу ҳақда инсайдер Экрем Конур ижтимоий тармоқлар орқали хабар берди.
Агар ҳаммаси муваффақиятли ўтса, 37 ёшли голкипер «кекса синьора» билан келаси йилнинг ёзигача мўлжалланган қисқа муддатли шартнома имзолайди.
Тажрибали дарвозабоннинг охирги иш жойи Бразилиянинг «Ботафого» клуби бўлган эди.
Италия чемпионатининг беш туридан сўнг «Ювентус» ўн очко жамғариб, турнир жадвалида еттинчи ўринни эгаллаб турибди. Турин жамоаси навбатдаги ўйинини 11 октябрь куни меҳмонда «Кальяри»га қарши ўтказади.
