УЕФА президенти Александер Чеферин ФИФА раҳбари Жанни Инфантинони танқид қилди.
Аввалроқ ФИФА УЕФА ва бошқа ташкилотларнинг норозилиги ортидан жаҳон чемпионатига тегишли айрим ҳуқуқларни сотишни назарда тутган лойиҳадан воз кечган эди.
«Бизнинг спорт туримизга бўлган ишонч учта асосий тамойилга таянади: бирлик, шаффофлик ва кўпчилик манфаатига хизмат қиладиган бошқарув тизими. Сўнгги вақтларда эса айнан шу тамойилларни ҳимоя қилишга ваъда берган айрим инсонлар уларга риоя қилмади.
Жаҳон футболини иккига бўлиб қўйган лойиҳа, эҳтимол, ҳозирча тўхтатилгандир. Аммо унинг ортидан йўқолган ишонч ҳали тиклангани йўқ. Энди бизнинг умумий вазифамиз — ана шу ишончни қайта тиклаш.
Италия ва бутун Европа футбол оиласи, шунингдек, бошқа конфедерациялардан бўлган ҳамкорларимиз бир мақсад йўлида бирлашганидан хурсандман. Футболни ҳимоя қилиш керак бўлган пайтларда доимо шундай бўлган.
Яна бир бор такрорлайман: футбол сотилмайди», — деди Чеферин.
