Сербия терма жамоаси сардори Душан Тадич Миллатлар лигаси 2-турида Нидерландияга қарши ўйиндан сўнг жамоасининг ҳаракатларини баҳолади. Учрашув Сербиянинг 1:2 ҳисобидаги мағлубияти билан якунланди.

«Ўйин оғир кечишини билардик, аммо майдонда жамоавий бирлик яққол сезилди. Биз гол уришни истадик, бу асосий вазифаларимиздан бири эди ва бунга эришдик.

Менимча, Сербия яхши ва фидойилик билан ўйнади. Жамоавий меҳнат жуда кўп бўлди. Шу руҳда давом этишимиз керак.

Агар Нидерландияга қарши шундай ўйнай олсак, демак, исталган рақибга қарши ҳам худди шундай ҳаракат қила оламиз», — дея Тадичнинг сўзларини B92 келтирди.

Сербиялик футболчи Нидерландия ўйинчилари ҳақида ҳам фикр билдирди.

«Уларнинг барчасини яхши биламан. Уларга қарши ҳам, улар билан бирга ҳам ўйнаганман. Уларни беш қўлимдек биламан.

Улар тезкор ва техник жиҳатдан кучли футболчилар. Менимча, биз уларга муносиб қаршилик кўрсатдик. Натижа бошқача бўлиши ҳам мумкин эди», — деди Тадич.

Сербия икки ўйиндан сўнг ҳали очко жамғара олмаган. 1 октябрь куни жамоа сафарда Германияга қарши майдонга тушади.